Namdang, Gamdang Party ah Lut Kei Ni !!

Tulai Zogam hot topic khat ahi 2010 Kawl Colonial Election tawh kisai muh dan tuamtuam ih zak tek bang ahi hi.

ZNC in bel 2010 colony kitellna ah lut ding cih thadah party register nangawn sawm lo hi. Bang hang hiam cih leh party registerna ah 2008 Kawl galkap thukhunpi ka pom ding ahi hi, cih sign kull sese ahi hi, tua 2008 thukhun pen ZNC in pomlo ahimanin register zong bawllo pah cihna ahi hi.

Tua bang kawmkal ah 2010 Colonial Election lut photphot a asunglam pan Zomi le Zogam ading septheih zah sem ding ci a, Party register pawl zong om in CNP le CPP te ahi hi.

Atunga Party thum ahi ZNC, CNP le CPP te panlak dan pen ih theihsa tek ahimanin tutung tam gen kei ni, kagennop pen tua 3 te banah Kawl Partyte min tawh mekuang lui sawm khenkhat om cih thu ahi hi.

Tua tawh kiton in Pu Kam Khen in zong NUP min tawh mekuang lui sawm kici hi. Hih tawh kisai in ciamnuihna ahi phial zong, atak ahiphial zongin ka ngaihsutna khat hong suak hi. Tua pen bang hiam i cih le NUP, NLD, DP, USDA cih bang partyte pen Zomite i kihel hang ei thuneihna bangmah om hilo ahi hi.

Party khat peuhpeuh pen Central le Central Executive Committe in thu vai hawm den ahi hi. Tua ahimanin Tua CC/CEC ah minam atam zawzaw in thu nei uh ahi hi. Amau cih bangbang a party mipi paikul ahi hi. Tua ahih tawh kitonin atunga partyte pen sia hi, pha hi ih cihna hilo in CC/CEC pen Kawlte vive atamzaw ahimanin Kawlte deih dandan a pai uhi mawk hi.

Tua ahimanin Zomi te'n i deih thu khat peuh ih sung hang, hong ngai khia sam ding uh a , ahizong Kawl Interest vive tawh atawpna ah thukhensat in vai hong hawm lel ding uh ahi hi.

Abeisa hun tampite enleng phamawh lo hi mah le, tuhun Millenium hun bek ah Zomite Kawl Party tuamtuam ah "AKAAI NGAWI" a va kihel kawikawi pen hoih nawn ding hiam, cih ngaihsut huai ta hi.

Politic a lunglut taktak te in ZNC panpih in, ameidawi zaw deuh le tu le tu donghu vai sai nuam te'n CNP le CPP te panpih leh hoih in um ing.

Minam dang, gamdangte party peuhmah bel, member mawkmawk a zong lut loh ding ahi hi. Bang hang hiam cih leh Namdang, Gamdang party kuamah in kum 60 val sung Zogam ah phattuamna bang mahmah semlo uh ahi hi. Asuk pen ahih leh Zomite khantoh nang bulpi ahi 'Zomi Self-determination' le Kawl tawh liangko kikimna (equality) hong dal uh ahi hi.

Tua ahimanin pupa hun hinawnlo, khawmu zaw deuhta ihimanin, Zomi Party khat peuh tha pia zaw ciat leng ih nahlawh pekzaw ding ahi hi.

Pu Kam Khen bilbel bel Satan tupa Tan Shwe le Pa Sian tupa Sian Thang (Cin Sian Thang) kikop a a campaign pih uh zongin, Mut Pu-MP cingzo samlo ding ahih ciang ci in, kei mimal bang in bel "Free Hand" a pia hi ta leuleu ing.
Note: 1990 Kitel lai Kamkhen pen Democracy & Peace party akici U Nu party panin Tuithang ah thugen in apaina ah Kawl la vasa ahimanin Tuithangte in Kawlla deihlo na cih san ngei uhi. Kawlla sak ding alem loh ciangin Vaila (kala la )khat sa ci uhi. (Admin)

By Zokhup
Src:Zonet