LZI Makaite Tungah Laikhak

Dear LZI makaipiteng (Zomi Communities Organization's EC)
Leitungbup Zomi Innkuan Kipawlna (Zomi Communities Organization) Executive Council (2010-2012)Panmun Apna 10th April 2010 in kibawl zo cihthu taangkona nong neih uh ka muh teh nakpi takin ka lung a dam hi. Zomite tangthu-ah mualsuang phuhna khat cih theih hi.

Zomite atam zaw pen ih gamah galkap kumpite bawlsiatna thuaklahin mun tuamtuam gam tuamtuam-ah gambel-in ki om kawikawi hi. Ih omna gamtekah Zomite kipawlna ki nei tek aa, ZCF, Zomi Innkuan leh kipawlna min atuamtuam tawh ki ding tek hi.

Anungta PASIAN abia Zomite ihih mah bangin ih omna tekah min tuamtuam tawh biakpiak kikhopna kinei tek hi. Ahi zongin leitung mun tuamtuam-a Zomite sepkhop nading kipawlna kinei zo pak lo aa, ki lunggulh mahmah tek hi. Zomite biakna tuamtuam, upna tuamtuam tawh ih om hang minamvai-ah ki pumkhat ding pen ki lunggulh mahmah hi. Ih kawlgam sungah Zomite ong lamsang dinga ih phuh ZNC party lah galkap kumpi in 1992 aa kipan phalna ong pia nawn lo mawk hi. Kawlgam sungah political party movement official in ki sem thei loin gampua mun tuamtuam atung Zomite lah gam leh minamvai-ah political party movement 1992 aa kipan deih bangin ki kalsuan thei nawn lo ong suak hi. Tua bang kawmkal panin 2010 election law in democracy leh federal ki-ukna adeih taktak Zomite adingin party din theih loh nading ciangtanna tampi ong bawl uh hi. Kawlgam sungah Zomi min tawh official party register bawl ding tutadihin piang thei lo-aa mipi in ZOMI min mah ki pakta tek hi. Tua bang hun laitak leitung bup Zomite ki pumkhat-in ZCO ding thei ahih manin ka lungdam mahmah hi.
Leitungbup Zomi Innkuan (ZCO ) pen political party hi lo cih pen ih theih satek mah hi. LZI pen biakna kipawlna zong hi tuan lo hi. Leitung mun tuamtuam-a Zomite kizopna ahih manin minamvai kipawlna ong suak hi. Zonet in Zomite email tawh kizopna mualsuang khat hong phut-in a kinoptuampih mahmah bangin, LZI in mun tuamtuam-a Zomite kipawlnate leh a mimal mahmah kizop nadingin official-in mualsuang khat ong phut na hi uh hi.

Tua hi-in leitung mun tuamtuama Zomi ong makaih ding EC 15-te pen Zomi makaipiteng na hi pah uh hi. Noteng mah ong kimuang ahih manin ih mipi nong makaih ding uh ki lunggulh mahmah hi.
TOPA in thupha ong pia hen la ZOMI bup nong makaih zawh nading un a kip a kho a picing kipawlna hi tawntung ta hen.

Zomi sungah,

Taang Nang Lian Thang

Tokyo, Japan

14th April 2010