Zomite Khuasakzia le Gamvai Kidemna

Zomite in gamvai ah a picing pen minam i hi kei hi. I omna mun toi in mi namkim tawh kizopna tawm hi. Beh le phung sungah kitelkhialhna tam pha diak a, beh le phung zong kithupisak diak hi. A sawtlo in galkap kumpi piak democracy dan tawh kiukna kipanta ding hi.Tua ma in kitelna nasiatak hong om ding hi. Kitelna thukhun (Election Laws) zong hong suakta hi. Zanglei ading in hih kitelna in ngaihsut bulpi (ideology) kidemna hilo ding hi. Kalsuanzia le party kidemna hiding hi. Nidang in democracy, capitalism, socialism le communism cihte hi in tuna kitelna in democracy kalsuanna sungpan totzia lampi kidemna hita ding hi.
Zomi sung gamvai kalsuanzia pen hamsa zaw le thuthuk zaw hi. Gamvai ah picinna neih le neihloh pen ka genthei tuan kei hi. A kician thu khat in Zomite gamvai kalsuanna in a kidem mite i hong piak lametna le kalsuanzia tawh a manphatna (value) kiciangtanlo tawh kibang kasa hi. Kitelna in gam thu tawh kisai veina le ngaihsutna zuakna hizo nailo lai khading hi.
Kampau kibatna, beh le phung kibang hihna, khua khat tuikhat hihnate tawh gamvai kitelna ah khensatna i bawl khak lai leh Guided Democracy ahi a, Liberal Democracy ahiphial zongin kibang veve lel ding hi. Party te in zangkuam ah kalsuanzia kidemna a bawl laitak, beh le phung thahatzaw kidemna hihsak lai ding maizum huai hi.
Kampau siam i cihte (demagogues ) pen mipil pen hi zenzen lo hi. Hitler le Mussolini te pen kampau siamte hi. A genthute hoih kisa in mite in zui nainai uhi. A tawpna ah a tunpih lampi in sihna le guallelhna ahi hi. Zomite gamvai kalsuanna in kampau siam khat tunga kinga ahihloh ding thupi mahmah hi. Gamvai makai ding pen gamvai ah kuhkal in a khanghamte dot huai hi.
Ataktak (real) ahilo tampi hong om ding hi. Gamvai suahtakna a omloh kum 20 sungin gam ading a tawlngalo le asem teitei a om mah bangin a lian a mang a mai-et zong tampi kiom hi. Minam le ankuang a khek tampi zong om hi. Khua hun hoih le a nuam ngakin a kua sungah a bu khinkhian zong om ding hi. Sih theih man theihna hun kum 20 sung mipi ading a nawk mite i manggilh khak le i awlmawh loh khak ding ngaihsut huai hi.
Lamdawt tawnlo in lampi man a tawnte mipi in kan siam ni. Suakta takin na ngaihsutna mun, na santhu telsiam takin kitelna pawi ah mi tel ni. Mipi deihna, kisapna amuhzawhna le a telzawhna , amah mahmah a muanhuaina le a kicing pilna a neihnate tawh kitel ding thu khensat ni. Zomi sungah party tampi mah hong om ding zong theisiam khol ni. Beh le phung, khua le tui le kampau tawh kitelnate nusiat kipan ta ni.
By Thuampi