Zomi Sungah Gamvai Kihtakna Sahlua

Zomi sungah gamvai nasepna tawh kisai kuamah i khialsak ngam kei hi. Bang hang hiam cih leh thuak leng a thuak ding pen ei i hi pah hi. Adang kua mah in hong thuak pih lo uhi. Sahang kihtak in i kihta hi. Hih gamvai pen a ukkha a lawp khate na ngawn in Zomi Community sungah mun ngahlo ding zah in kihtakna gol hi. Zomi ( Tedim kampau) mimal bangzah pha ta ding ih hi hiam? Tuate sungah gamvai tawh kisai in kolpi khauhen a tuak kua teng om hiam.
Mi pha zah tawh hawm le hang minam pi khat hihna dingin a kituak mihing phazah in gamvai a sem mi a om nai ding hiam.

Pu Chin Sian Thang tawh holimna khat ah Sitni pa in gamvai tawh kisai kihtakna nasia lua ci in gen ngei hi. Tua ban ah kei kiang hong hawh ding na ngawn uh a lau zaw zen mi pawl khat om zen hi. Kei kiang hong hawhna hangin a kiman ka theih a hih leh om nailo hi ci in gen lai hi. Journal pawl khat ah zong Kawlgam gamvai pianzia in valkai kihtak luatna om hi ci in gelh uhi.

David pen gam uk khat ahihna tawh Pasian a biak hun a om mah bangin namsau tawi in gam a ding na a sep hun zong om veve hi. Kamsangte in zong kumpi te mah lamhilh in lamlak uhi. Mipi le Pasian adingin a kisapna mun ah a nuntakna pia dingin kiging kha ding ka um hi. A taktak in Pasian thu i cih zong gamvai tawh kizom veve hi. Hih bangin ka gen kua mah atuam kawk nuam ka hi kei hi. Ka lungsim sung a om bangin a gen ka hi hi. Mipil om sunsun le sumhau mitei om sunsun in a theihhuai gampai zia le gamvaite mipi tawh i kimeltheih sak ding hoih ka sa hi. Mipil le mitei tampi takte i gamvai tawh kisai muhziate pai khial mang in a mong lang khat bek sit ta hi. Hih in i gam ading ahoih pen hong hi hetlo ding hi.

Kawlgam sung na ngawn ah media te in kumpi tawh kisai, mipi tawh kisai thute nasia tak in gen in gelh ziahziah ta uhi. Suahtakna gimnam kiza ta hi. Journal tuamtuamte sim le hang gamvai ading zinsang phalvak bangta in ngaihsun thei ta ding hi hang. I gam sung pen gamvai ah kihtak ding hun beita in ommaih ding le kalsuan ding hun hong kipatna tel tek zaw ni.

By Thuampi Jan 11, '10 2:34 AM