Dear Zomi leh Zogam,

Kawlgam bup thudiklo leh thaulawng tawh a uk cip kawl galkap kipawlna ( SPDC ) te kiteelna ( Election ) bawltawm tawh kisai in Zomi leh Zogam ading kei mimal muhna tawm hong pulak nuam ing.

1962 kum akipan U Ne Win in, hihlampi asial toh hi a, galkap sung ah tutphah kip theihna ding bek ngaihsun in,cikziatna leh itna khatzong omlo ,gambup mipi te lampi tuamtuam tawh gentheihna kuampi sung ah hong puak uhhi.

1988 kum in, gambup mipi te deihkik na a hi Democracy lungphona tawh kisai in, athutawh bangmah semkhia loa, thagum leh thaulawng tawh hong sumai leuleu uh hi.Mipi in thuneihna ( human right ) bangmah kinei theilo in,ih kamdim in zong pautheihna ( Chance ) kineitheilo hi. Hih zahtak a, mipi te anenniam Galkap te in, kawlgam khantohnang ciden in zuaupi bekbek tawh hong ukcip ahihlam mipi in ihtheih kimciatsa ahihi.

Tu in kiteelna bawl ding ci phiauphou in, tua kiteelna bek paulap in, NLD party leh mualtungmi party te asukmai nopna 100% kilangh tak mahmah hi.Amau tupna ahihleh Galkap te in, kawlgambup leitung beidong ukcipding cih hi lel ahihman in ei mipi te ading phattuamna aom vetlo galkap te ROAD MAP a hihi.

Abeisa in Zomi mintawh ZNC party in Zogam ah,MP 2 tawh hong ding khin a, Zomi te tangthu a thei kawlte in hong lau uh ahihman in abei theihtheihna ding dan tuamtuam hong bawlsia uh ahihi.Kawlgambup ah NLD te mipi in sangtheipen ahihman in amauading alauhhuai pen NLD party te ahihi. Amakai pi nu ASSK mahmah zong kumciangttan omlo thonsung denna zelden uh ahihman in,a gamtatna te uh cikziat huai mahmah hi.

Tuni in, Zomi te in, mailam ihtotding lampi telkhial kei ni. Mipi phattuamna ding a sem,aphukhia,a zuunkhia ZNC party makai panmun lente khensat na nuai ah kilungtuak tak in ih pankhawm ding akisam thu leh alo theilo dinmun ahihi.

Zogam, Zomi Political movement ah na semkhia ahi ZNC ( burma ) leh india gam pansan in thauvui thautang tawi in minam leh gam ading nasem ZRO te thusuak om bangbang in ih thukim pihding ahihi. 1990 kum in kiteelna ah ZNC min tawh MP 2 ihneih sunsun ahi, PU Cin Sian Thang ( Burma ) leh PU Thang Lian Pau ( India ) aom te amau zong thukizasak lua mahmah ding uh a,ei mipi te in amau khensatna bangbang ih nungzuih ding a hihi.

Tua lo in, ki tangpek in, galkap te maiet nopna, mindeihna, angsung khualnopna bek tawh Zomi Zogam paulap in Political sem nuam dan pong in, nong kihel uh leh Ko Zomi Zogam News Generation khangthak te in na gamtat na kampauna, nasep nabawlna te uh hong ki encik gige leh record omden cih naphawk ciat un.

Abeisa in minam leh gamading bangmah kamkhat zong akek khia gamlo pi tutung in minam it mahmah nong kineih uhhang in, hong khem zo nawnlo ding hi uh teh. Tua ahih man in Minam ih it taktak leh asemtakpi te aphukhia takpi te nungzuih siam ni cih hong gen phapha nuam ing.

Thumang loin, na kitang pek veve uh leh Na min na puam uh, na behna phung uh leh na tu nata , na tusawn na tasawn khangtang thu ah, Belmang kinuhding a,mimuan loh guinam na suak ding uh hi.

Hih atung thu te kong atkhiatna thu ahih leh Zomi te leitung ah mihai na zonzon hang munawn loding hihang,Mipil let lua vive ihhih ciatman in,metna ding ahihnak leh minam azuakgam ciang dong lungsim ihneih theihna ding hih mi gongtat galkap temah in hong training ahihlam phawk ciat ni. Hibang mah in asia leh apha hangsan tak in khensat hun ahihman in, ZNC leh NLD in kiteelna ah kihello ding acih kihelloh ding hipah lel hi..

Atelsiam ding in Topan thupha hong pia ta hen.

Veina taktawh,

Tg.Zogam Mungno

International Tongsan Consultant

Nashavile, USA

Src:Tongsan Webside