Zangkong Ah Bomb Puak tawh Kisai Muhna

April 15 bomb puak ma diak in Saloon meikhu color mawtaw khat sung pan mi 2 pusuak in bomb tawh aden uhi cih tulaitak thang mahmah hi.Galkap mangte tu le ta te pen khangno vive hi'n ngong tat thei mahmah uhi. Tuate sung pan khat le nih in midangte gualzawhna hazatna tawh bomb tawh aden sak uhi cih zong ki um mawh hi.
Galkap kumpi in mi 120 val le journalist 4 tulaitak man in thusit uh ci hi. Nidang tawh akibat lohna khat ah tutung galkap kumpi in kuamah min tawh mawhsakna nei lo in, migilote hi ci pong hi. Migilo kua hiam.
Zangkong ah April 15 ni bomb puak tawh kisai in ngaihsut ding tampi om hi. Kawlgam khua hun tawh kizui in thau le hei atawi, anei le azang thei pawl thum kimu thei hi.
1) Kawl-Thai gamgi ah om gamvai nasemte
Kawl-Thai gamgi ah om gamvai nasemte pen tulaitak huhna ngahloh le Thai kumpi khut nuai ah haksatna tampi tawh akalsuan laitak uhi. Khat le khat kilemlo in buaina tampi le nuntak ding zong haksa dinmun ah om laitak uhi. Operation bawl zo ding din mun ah om lo uhi. Tua ban ah gamvai tawh kisai lai hawm, spray kap cih ciang zong luang kham liangin akisem ahimanin bomb tua zah puak ding ngaihsut zawh hi lo hi.
2) Mualtungmi Thautawi Singnuaimite
Kawlgam ah mualtungmi thautawi singnuaimi pawl tam mahmah hi. Aihang in tulaitak Gamgi Cing Galkap (BGF) vai tawh kisai Kawl Galkap Kumpi tawh kinak buai mahmah uh in gamgi dungah ki ngikngik le aki um cih laitak uhi'n Zangkong ah bomb vapuak suk ding lem lo lua ci uhi. Tua ban ah gamlak ah tuk le khal in galdo lam kiva zaw uh in khuasung ah pai bek ding zong mai ngal lo uhi.
3) Kawl Galkap Kumpi
Kawl galkap kumpi hunsung in Bomb puak tawh kisai thuman kithei kha taktak lo hi. Bom khat puak leh gamgi ah om agalte uh ban ngawh pong thei uhi. Secretary (2) inn sung ah a tanu sihna bomb puak vai, Buddha Hapi tang Sen gam pan hong pai lai in bomb puak vai, S (2)mahmah asih lawhna vanleng kiat vai, Inn Ya lampi ah luang 5 kithat vai cih bangin amin thang mahmah misihnate tawh kisai mawhna neite tudong ki thei kha lo hi.
Galkap kumpi in Naypyaydaw ah khuapi akituah khit akipan Zangkong khuata bawl nuam uhi. Adiakdiak in Tuibuah pawi ciang Naypyaydaw ah mi omlo in hi lik liak uhi. Zangkong tuibuah pawi pen tangtawng akipan nasia mahmah ahimanin mitam den hi. Tua tawh kisai mipi lau thawng nading le lungkiatna dingin bomb tawh aden uhi ci zong ki ummawh hi. Tua ban ah Tuibuah pawi ading stage lamna ding mun pen Kandawkyi kuam bek ah phalna pia uh ahimanin target khat ah ki sutuah sak suak hi. Tuibuah pawi sung bomb puak thei ding ahimanin kidop ding zong galkap uliante bawng sung ah kigen kholhna nei uh ci hi.
Bangbang hi leh kuakua khut lum pan ahi zongin athuakpi pen mipi mah ahi hi. Pasian thuzuite ading ahi zongin, mihing lumsim pua limlimte ading ahi zongin sep dingin aki lawm lo gamtatna hong suak hi. Kawlgam sung buaina asia lam manawh tektek lai ahimanin mailam ah zong sisan naisan luanna tampi hong om lai ding suak hi. Kawlgam nuntakzia pen inn huang sung ah khat peuh in bomb tawh hong deng thei din mun ah ki tung ta hi. Gambuaina pan in gamhoih kikna ding,kilemkik nading mapan theihna tek pan mapang in lung hi mawh den hong kul ta hi. Ei tawh kisai kei ci'n om mawk theihloh hun hi.
Src: news tuamtuam pan