Leitungbup Zomi Innkuan Kipawlna Panmun Apna Kibawlzo

Leitungbup Zomi Innkuan Kipawlna(Zomi Communities Organization)

USA, Canada, UK, Denmark, Norway, Sweden, Germany, India, Singapore, Malaysia, New Zealand, Philippines, Korea



Taangkona : Executive Council Panmun Apna Kibawlzo

1. Leitungbup Zomi Innkuan Kipawlna (LZI), Board of Trustees pawl in teelcing Executive Council (EC) tung ah Panmun Apna Hunpi (Inauguration Ceremony) khat April 10, 2010 (Saturday) ni, nitak lam nai 5:00PM pan 6:30PM (US-CDT) hun in, US gam Oklahoma State, Tulsa khuapi, Southern Hill mun a om Hilton Hotel ah limtak in (solemnly) kibawlzo hi.

2. Hih Panmun Apna Hunpi pen leitungbup a om Board of Trustees panmunlen khempeuh leh teelcing Executive Council panmunlen khempeuh inzong Teleconference tawnin hong kah thei uhhi. Internet Streaming tawhzong Live Webcast kibawl hi.

3. Panmun Apna Hunpi pen Tulsa khuapi phualpi in nei-in a kibawl hi a, LZI thapia in teelcing Makaite kipsakna leh thupha apia dingin Zomi Innkuan Oklahoma kipawlna Board Member khempeuh, Tulsa khuapi sung a om Zomi-te pawlpi tuamtuam pan pawlpi kem Siate, Pasian nasem Siate, khuanu khuapate leh minam a it khangnote hong kah thei uhhi.

4. Panmun Apna Hunpi sung ah ZIOK Board Member khat ahi, MCC pawlpi kem, Rev.Dr. Kham Khan Khai in hun-ukpi sem a, Panmun Apna hun lianpi pen Indianapolis a om, US gam sung ah Zomi-te’n “Attorney at Law” khat ih neihsun, Dr. Lun Kham (Doctor of Jurisprudence) in hong makaih a, teelcing Makaite khat khit khat EC panmun a san leh sanloh thu ahong dotkhit ciangin, Board of Trustees buppi tang’in kipsakna leh theihpihna hong pia hi. Tuaban ah, Zomi Innkua USA Vice President panmunleh, MZBC pawlpi kem Rev. Thawng Khan Cin in teelcing EC Makai khempeuh a’ding in Anungta Pasian tung ah thupha ngetna leh LZI buppi thuphapiakna thungetna hong neihsak hi.

5. Panmun Apna Hunpi pen Board of Trustees pawl innteekna tawh a kibawl ahih bangin, Board Chairman Dr. Chin Do Kham in thukong honna thugenna nei a, Board Secretary Pa Go Sawm Khup in thupulakna bawl hi. Hun leh vai khempeuh Anungta Pasian tung ah apna thungetna pen FEMC pawlpi kem, Rev. Cin Khawm Kham in hong neihsak a, hun leh vai khempeuh a kizawh ciangin, IFGA pawlpi kem Rev. Pau Khan Mung in lungdamkoh thungetna hong neihsak hi. Panmun Apna thapiakna in Taangko lasa siamte ahi Sia Tua Mung leh Sia Kap Mang in “Tuun Nu Zogam” lapi hong sak uhhi.

6. Executive Council sung a panmunte teelcing Makaite tung ah a ki-ap khit ciangin, President Dr. Chin Do Kham, General Secretary Pa Go Sawm Khup leh Treasurer Pa Pau Khan Khup in panmun sanna thugenna (Acceptance Speech) hong nei uhhi. Tuamah bangin Asia gam lam pan EC Makaite tang’in Pa Hang Khan Lian, Europe gam lam pan EC Makaite tang’in Pa Thang Sian Mung leh America gam lam pan EC Makaite tang’in Pa Do Khan Khup in panmun sanna thugennate thangah huai takin hong nei uhhi.

7. Pamun Apna Hunpi sung ah akah mipi in “Tuun Sung Khat Pan” lapi sakhawm in hun kihong a, “Zo Laukha Paallun Ding” lapi tawh hun kikhup hi. Hun bawlna phualpi ah akah mipi in hun zawh ciangin pankhopna lahna in eima anguaiciat tawh ankuang umkhopna kibawl a, LZI thapiakna leh minam itna tawh Pa Cin Sian Mang in zin leh leeng teng leh Tulsa khuapi pan teelcing EC Makaite an hong vaak a, lungdam takin kinekhawm hi.

8. LZI EC Panmun Apna Hunpi pen Europe gam lam ah zankim hun, Asia gam lam ah phalvak hun ahih hangin teelcing Makaite leh Board Member-te in minam itna, deihsakna leh hanciamna takpi tawh Teleconference tawn in hong kah uhhi. Internet Streaming tawh Live Webcast penzong mun tuamtuam panin mimal (50) valin en-in tha hong pia uhhi.

9. Tu a kipan in LZI kipawlna mailam kalsuanna maban tawh kisai thute Executive Council in a hun zui-in hong pulak ding uhhi. LZI kipawlna a kiphuh a kipan EC Panmun Apna Hunpi ciang LZI kipawlna a makaih Board of Trustees pawl pen a maban lawhcing takin a tun, a gualzo in kiciamteh thei hi.

(Theih ding : LZI EC Panmun Apna Hunpi sung teng ciaptehna Video pen asawtlo in YouTube ah hong kisuaksak ding hi).

Executive Council

Leitungbup Zomi Innkuan Kipawlna

Tulsa, OK, U.S.A. April 12, 2010.


Zomi Communities Organization

Executive Council (2010~2012)



President : Dr. Chin Do Kham, Jenks, Oklahoma, USA

Vice President (1) : Pa Hang Khan Lian, Singapore

Vice President (2) : Pa John Thang Sian Mung, London, UK

General Secretary : Pa Go Sawm Khup, Tulsa, Oklahoma, USA

Asst. Gen. Secretary (1) : Pa Do Khan Khup, New York City, NY, USA

Asst. Gen. Secretary (2) : Pa Anthony Gin Khan Lian, Frankfurt, Germany

Treasurer : Pa Pau Khan Khup, Singapore

Assistant Treasurer (1) : Pa Vung Lian Mang, Tulsa, OK, USA

Assistant Treasurer (2) : Pa Khen Za Muan Thang, Denmark

Member : Siama Cing Pum Neam, Philippines

Member : Dr. Howard Chin Khen Mang, Tulsa, OK, USA

Member : Pa Kipp Kho Lian, Hamburg, Germany

Member : Pa Gin Mang, Calgary, Alberta, Canada

Member : Rev. Zam King Mang, Portland, Oregon, USA

Member : Pa Disciple Kap Sian, Kuala Lumpur, Malaysia