Norway Kumpi Palaite le NLD Makaite Kimu

9 April in Norway State Secretary Gry Larsen makaih Norway palaite le NLD makaite NLD phualpi ahi Shwe Gong Dai Zumpi ah kimuhna nei cih kiza hi. Norway lam pan State Secretary Gry Larsen le Thai gam ah om Norway Palai pu akipan ulian 5 pha uhi. NLD lam pan Vice president U Tin Oo, u Nyunt Wai le U Than Htut makaih CEC te cih bangin kihel thei uhi.
Norwayte hawhna thu apulakna uh ah ' Kawlgam sungah gamdaihna apiang zawh nading, gambup kilem kikna aom zawhna ding le Kawlgam ah Democracy ngah zawhna dingin NLD in bang teng ngaihsutna nei cih le koi ci vaihawmna om cih dotna hi' ci uhi.
NLD te kitelna lutloh tawh kisai zong dotna nei uhi. NLD makaite in agenna uh ah' Kitelna alutnuam lo hilo, Democrazy le Human right deih luatna hangin NLD aki phuan hi'n, tu dong tuamah kibulphuh pen hi. Kitelna ah NLD luttheih lohna dingin hong kibawl hi zaw hi. Tua ban ah Kitelna Thukhunte athuman lohna thute akicing in pulakna nei uh cih hi.
NLD dinmun tawh kisai in zong Norway kumpi in China, ASEAN gamte ah agensak theihna ding uh zong NLD makaite in kam vak khak uhi. Norway kumpi lam pan in zong Kawlgam ah democracy ngahna dingin abeisa mah bangin panpih suak ding kam ciam pia suak uh cih zong kiza hi. Norway pen Kawlgam mite adingin TV station koihsak, gambel tampi om nading mun apiak ban uh ah mun tuamtuam ah huhna tampi apia gam picing khat hi.
Src; DVB