Kawlte Gamkekna Pan Minam Tangin Apangngam Hausate Lai 2008

2008 Kum kipat lam in kua mah theihlo in apiang thu hi. Nyapyaydaw pan Land Record Department Directorte pawl khat le Kawlpi Land record department pan zum nasemte kipawl in kuama theihloh in gamgi hong tehsim ngei uhi. Tua thutawh kisai in Kawlpi le Tedim gam gamgi ah ateng khuate' hausa, upa te in gam le minam supna lianpi hong tunding sang zolo uh ahimanin luangkham liang dongin kithukimna nei'n galkap kumpi tungah lungkim lohna lai at uhi. Tua thu aki theihtheih ciang khangno, siamsin sung akipan ahi thei bangin thu kizakna nei in, ZNC makai lam pan in zong UN le Media lam dong ah gen khia uhi. Gamkek sawm Kawlte khawl kik phot uhi. Tua thukituak tak in nasep khopna hangin Zogam leitang Aka 7,000 val kikem zo hi. Hi kei leh Tedim gam neih sunsun zanglei teng le Siyin gam sung ah om dolkung le singkung kepteng aki nei nawnlo thei ding dinmun ah kiom hi. 2008 Thukhunpi tawh kisai me piak laitak hi'n Kawlte in gamgi ciangtanna abawl sim nop uh pen Thukhunna thak ah guang nuam uhi cih ki ummawh hi. Tudong mah lungmuan om tuan lo hi. Gamkek dingin summang manman lai uhi cih phawk tek ni. Hih thu tawh Kisai in ZNC Makai Pu Chin Sian Thang in media ah agen ciangin Naypyaydaw ate nangawn ling lawng zo in khat le khat kinak mawh sak mahmah uhi. Naypyaydaw pan in Haka aom Chin State Land Record zum le Kawlpi Land Record zum ate nakpi in tai gawp pong uhi. Chin State ah Land Record alianpen pu in Tedim Land Record Departmentte hapsuk gawmp in last warning pia hi. Bang hang hiam cih leh hih thu tawh kisai kawlngian pen Hausa te in amuh theihna ding thunei, thu thei, zumnasem te mah in alam lak uh na hi gige dan hi. Zomi sungpan, siamsin, khangno, hausa upa, kumpi nasem le gamvai nasemte kithuah khawm in Kawlte gamkekna pan thuman thutak len-in gualzawhna tawh Zogam kikepna lim lak khat hi. Tangthu ah ciapteh ding le etteh den ding kisam hi.