Bo Hum Ngai in Zomi ULian Khat Pangbet

4 Dec 2010 ni zingsang tung 6:30 AM hun in Zogam Khuapi, Haka ah thupiang hi. Kawl kumpite in kumsim phalbi tunsim in aneih uh ahi zingsang tung khuazang bup, mipi lam siauh pawi kinei den hi. Tukum zong Haka ah 4 Dec 2010 in kipan uh aa, mipi 2,000 val ding bang kihel thei hi. Kum dang in 500 kim khawng bek pha den ci lai uhi. Tua mun ah tulaitak Zogam Pu ahi Bo Hum Ngai zong makai in kihel hi. Kumpi nasem khempeuh zong zawh thawh thu tawh zingtung lam siau khawm ding cih thupiak aneih den uhi. Tulaiak Haka ah Township Peace and Development Council Chairman ahi Pa Suang Khan Thang, Saizang khuami, hi'n Bo Hum Ngai in mipi mai ah tai gawp in, mipai zah tawm lua, mipi kai khawm zolo, gina lo ci dikdek in athatang neih zah tawh apang bet sak ahimanin Pa Suang Khan Thang a sunglass (miat man)ki lawn khia in, kituk liang hi ci uhi. Tua thu tawh kisai Haka ah Zomi om teng, Haka khuamite akipan kumpi nasem sung ah alungkim kuamah omlo hi. Pa Suang Khan Thang pen ama pilna, nasep siamna le kump tampi kumpi nasem in minsiat nei ngei lo hi. Kua kumpi akah zong in Administration aki ci Interim Ministry ah ulian vuandok mangpi ahi den ding hi. Pa Suang Khan Thang pen 1979 akipan tuni dong citak tak in kumpi na sem hi'n BSc (Physics) , Master of Public Administration (MPA) man khin hi. Service bek tawh U Lian sem hilo in, pilna tawh asem hi. Kawlte dan in tattung bia hi leh Director General khawng angah khin ding hi. Kum 50 pha khin cih thu hangin zakhang sak nawn lo lai uh ci hi. Bo Hum Ngai pen galkap sung pan hai hang in, zakhang toto le Zomi ahihangin tattung biakna zui ahimanin ulian asuak bek zo hi. Kitelna ah zong apianna khua Mindat pan lut in, Zogam Paliman ading tel cing ngah hi. Zuahtatna le gitlohna tawh me zong uh in, sumtang 1,300 lakh val zang khia in, khantohna ding le lamtawhna ding pia hi. Mekuang luina ah alelh le tua sumte pen Mindat gam ah mite leiba suak dingin, loh kik sak ding cih tawh avat uhi. Tu in galkap kumpi ukna sung pan Zogam Pu asep mah bangin, hong pai ding kumpi thak kici le Paliman thak pan in amah mah Zogam Pu mah hong hisuak veve ding hi. Kawlgam mun tuamtuam ah ulian sem ding satan hawm khin uhi.

Note:Lengtong Blog pan akisuak sak thute pen direct in ki copy thei hi. Reference suahsakna ah www.lengtongblog.blogspot.com ci'n akicing in suaksak ding kisam hi. Tua lo in, data te la khia in, lak copy in, news thak dan in koi mah Zomi media, kawl media, mang media ah suahsak ding kiphal lo hi.