ZOMI BUP DAHNA NI

COPE CENTENNIAL CELEBRATION LEH ZOMI BUP DAHNA NI

Hun sawtpi lai pek i ngaklah mahmah ahi Cope Centennial Jubilee Celebration pen November 4-7,2010 sung kibawl ding kim lai, Kumpite mee khiatna ( 2010 Election) hangin November 25-29,2010 sung kikhin to ahi hi. Hih CCJ pawipi sung nasep zia leh hungeel ziate zong hun sawtpi akipan picingtak kivaihawm khinsa hi-in, leitung bup mun tuamtuam ah Zo vontawi te in CCJ malep pawi cihte zong thupi takin kibawl kawikawi ziahziah hi. Tua bek tham loin, CCJ pawipi pen leitungbup Zomite lungdam kipah ni hun thupi khat ahih manin Zogam khuapi Tedim mahmah ah kiheltheihna ding thungetna tawh kihanciam in pianna Zogam nuam Tedim Khuapi ah Zo Vontawite kituah ziahziah hi hang.

Tua bang kawmkal ah tuni November 25, 2010 ni-in CCJ pawpi hong tung petpet ta a, Tonzang pan pawi sim ding mi 80 tuanna ZoTang Express pan Bus khat Zalui tung deuhah tuahsia in mi 14 sipah uh a, 30 valte nasia liam mahmah cih kiza ahih manin Zomi bup dahna leh kapna ni khat hong suak hi. Rev. J.H.Cope topate' nupa phawkna kum 100 cin phawipi pen i sanggam it luang 14 in tuni in Zomite tangthu sungah a mangngei nawn lo ding sisan tawh tangthu hong gelh ta uh hi. Abeisa kum 100 lai pek a Zomite tangthu hong gelh sak American mi Cope topa pawipi "Cope Centennial Jubilee Celebration leh Zomi bup danna Ni " pen khang sawnsawn kum 200, 500 leh kum 1000 dongin kimangngilh nawn lo ding hi.

Hongit Topa in Zomite tungah bang deihna nei hi ding diam cih lungngai-in, i Topa mai ah kiniamkhiat in thungen ding hi hang. CCJ pawpi tungtang ah nuntakna hong piakhia i sanggam 14 te hangin adah akap Zomite khempeuh Pasian Khasiang Tho in hong hehnem hen la, Khang sawnte'n tuan tu bangin cing den hen. Zomite dahna kahna ni leh khimpi zinni pen Vanglian Pasian a minthanna ni thak suahni hi ta peuh hen! Hong nusia i sanggam tengin a nopna mun i pa Pasian ang nuam sung( Rest In Peace) tawldam ta peuh hen ci-in thupha i paih kawmin, Zomibup dahna ni-in International Tongsan Media Groups pan Dahnapihna luankhi i nul hi.

Motto : "... Hong tung ding hun ah na tate un, hih suangtumte bang acih nopna ahi hiam? ci-in hong dot ciangin note lakah lim khat hi ding hi..." ( Joshua.4:6)


Zomibup Dahna hun sungah,

Tongsan tanute
Headquaters
Kawlpi, Zogam
www.tongsan.org

Src:Tongsan