Tonzang-Tedim Mawtaw Kiat Updated News With Correction!

Updated version: Sihvuina tawh kisai
Saturday Nov. 27, 2010 11:16 p.m.

Lomzang-Tonzang Rev. Hung Suan Thang (Sia Hung Suan) Sunday nitak lamin Tonzang ah kivui ding, siapa in tulaitak Rev. Pau Khan Dal’ GAG pawlpi ah huhsia a seplaitak hi.

Gamlai-Tonzang Pa Nang Khan Cin (Tawngpi), Saturday Nov. 27 ni-in kivui khin hi. Tawngpi, zanni in Gamngai ci-in gelh khial kha ing, Gamlai hi zaw hi. Tonzang GAG pawlpi mikhat hi-in, solfa siam, la siam mahmah khat hi a, a tanu Lia Mang Ngek zong tulaitak Malaysia ah om in, Zomi Christian Fellowship(ZCF) ah Worship Team ah limtak kihel in, zanni mah in zong ZCF in tutpihna nei hi.

Tonzang Sanggam Pawlpi Upapi Pa Lian Za Pum, a zi, leh a mo Nu Man Hoih Cing: Hih Pa Pumte innkuan aadingin tuahhak phadiak ding hi. India ah Laisiangtho Pasian thuthuukpi a sin, Pa Pum’ tapasal a nihna Tg. Pau Sian Mang in saklam pan inn a delh suak pah hi-in Sunday ni-in Tonzang a tunsuak zawh leh vuina neisuak ding, uh ci hi. Pa Pum’ tatum pen Tg. Khup Hau Kim in zong a pilna sinna Yangon pan in khualam a delh to pah hi-in, inn tung nai lo deuh hi. A uupi peen uh Malaysia ah om in, (Pa Pum te tuno) a tano uh pen a nu leh a pi a pu in mawtaw sungah Nu Vung Suan Niang(Vu Niang, Pa Tuan Khen Mang’ zi), a tawisak uh hih tuak a, a nih un (naungek leh Nu Niang) suakta uh hi.

Nu Niang(Vung Suan Niang, Mrs. Tuan Khen Mang, Immigrantion zum lai at) pen tei sinsen in thu kidong kihopih thei siset, naungek bangmah ci vet lo, ci uh hi. Nu Niang pen Tedim siavuante’n Kawlpi, Yangon khawng delh kul liang dingin, thusia om lo, ci ahih man in a laigui kizoppih Yangon-a teeng Nu Niang Suan Lun in zato kibawl dingin a sap hang in paisuak suk ding in, ngaihsun lo hi. Tedim ah a laigui kizoppih Pa Kai Go Cin te zong om a, a pa ki unau pih a u Lian No (ka nupi ii a minpi theipak kei mawk ing! Siapi Gin Khen Thang’ zi) te leh meltheih a kuamahpeuh in thusia lakpan thumanpha peen ci in kinak nuam mahmah hi. Malaysia ah zong a tate Thaw Thawn(Nang Khan Thawn) leh anaute nih zong om uh hi.

Lia Kham Hau Niang: Lungtak-Tonzang Pu Thang Cin Kham’ tunu hi-in, Nov. 29, Monday ni-in, kivui ding, ci-in za ing. Zanni-in Pa Ai Khup’ tanu, Mang Hau Nuam’ nau cikha ing. Pa Lun Sian Pau’ tanu na hi zaw hi.

Sipeen ULIanpa’ zi ThanHlangte nupikhat ka cih pen Saturday Nov. 27 ni-in Tonzang ah kivui ci hi.

Tuitum E.B.C. pawlpi Pa Vung Khan Mung’ zi leh a tanu, Nov. 28, Sunday 3 p.m. in kivui ding. Pa Mung’ tapa Tg. Hau Sian Suum, Malaysia ah om a, ZCF in tutpihna nei ding uh hi.

Nungakpi Ni Ngaih Man, Tuiphum Z.B.C.M. in suumkiim Sunday nimah in vui ding uh, ci hi. Hih ni ngaihman a cih pen tudong a minpi thei nai pak kei ing, Pu Lian Suan Pau tawh a pa uh aki unau ci hi. Pasal or tanu tapa nei ngei lo a, zong mothak ngei lo hi. Nungak hi.

The late Pu Rev. T.K. Thawng Khaw Nang’ tapa Pa Sian Cin Kham Leh Nu Nia Nuam te tanu; Tulaitak Manglai Tan 5 pilna a sin, Tonzang E.B.C. khangno Lia Dim Sian Cing (Siaan Siaan), Nov. 29, Monday ni-in kivui ding hi.

Nov. 27 Saturday kithuzakna tung tawn in Tonzang, Tuitum, Tungtuang, Salzang, Tauleeng, cht. leh khuadang pan hih sihna liimguam sungpan dawi havang kal ah Pasian honkhiatna vanglian tawh a suakta khia i sanggamte 36, tulaitak Tedim zato ah om hi.

Pu Gin Khaw Thawn leh a nau Pu Kham Suan Lian zong hih mawtaw kiatna sungah om uh hi. Pa Thawn No pen khuaphawk sitset, ahih hang a siaak-mit nuaiteng khat kikhep or kitat khial kha in, a pum pi a tat a heek zia nop lo or haksa sa, ci hi. Ahih hang in hih tuatsiatna sungteng a khuaphawk sitsek hihtuak hi. Tulaitak Pa Thang Hen Tuang(The Tuang) in Tedim zato ah Pa Thawn No a kep laitak hi. Pa THang Hen Tuang (The Tuang) tanu khat zong hih tuatsiatna ah pa in, ahih hangin zato lup kul lo, tulaitak Siapi Gin Khen THang te Inn ah om hi, a dam siangteh innlam ciah to ding, ci hi. Pa Suan (Kham Suan Lian), tuun a Tedim inn ah om hi. Bangmahpi thusia omlo, tawmvei khuaphawk lo, cih bek hih tuak in, zato lum suak lo hi. Mawtaw tungdawm pan siamna-thei Jet Li, Jackie Chan-style dankhat in Pa Suan leengkhia ngiat khaman hihtuak hi.

Tualo zanni a ka gen Tuitum Sia Khen Kap suahpih Lia Deih Cing leh, khuapihte tawh kisai; a cian zaw in zakbeh nai kei ing. Siapi Lian Suan tanu nungkum a Tan 10, “D” tawh a zo ka cih pen, “bangmah ci lua lo”, “hoih” hong ci uh hi. Tedim zato ah Tuitum pan 8 om hi.

Tuimang siapi Tuimang Langh Khan Suum a khua a tui ah kipua to suak, ci hi. Tonzang khua sungah hih siluangte a pua mawtaw, mawtawsaikel te ngak leh dawn in; khuazangbup khuanu khuapa te khitui naptui tawh dipkua patau linglawng kawm leh mulkim cikzia mahmah kawm sa-in lampi dimin sidelh kiphu ziahziah ci hi. A leitang sisan naisan tawh kidim hi!

I painading leh i kingakh nading midang mundang pasian dang om om vet lo a, Hehnem siam pen i biak Zeisu Topa Khasiangtho Pasian bek hi. Tua i biak Topa Pasian hehnepna i leitang i lungtangte khatciat leh i gam i lei ah hong om ta hen!

Tonzang khua, Tonzang gam mite in banghang in hici tuat siat deuh sese hi ding i hi hiam? Manta khal gah a ne kha i hiam? Nahtang to lawk a ne kha i hiam? Mihing khuak in tuatzo leh ngaihsun zo vet lo hi. I lampi leh i leitang tungah dawimangpa satan leh kha-nin kha-gilo te in gual zo lua ta a, tua thusia in sihna dong ah a luang luang in hong hingmat in a teek a khang a hong netum hi hell hiam?

Pa Pum, Paasang’ nu leh a mo; Siaan siaan, Sia Hung Suan, Pa Tawngpi, leh hih tuahsiatna tawh leitung hong nusia laizom sanggam itteng aw, ... a nuam in na pai ta un! Ni khat ni ciang, misiangte thoh kik hun hong tunteh vanthak leh leithak ah a tawntung in a maang khawm dingin tuni in hih leitungah n’ong nusiat na hang un, mulkim dipkuatna tawh mangpha hong khaak; keimah Tg. Pau Lian Nun; Nov. 27, 2010 Saturday.

Nung Ciang In A Nopna

Sun sang a pha zaw gamnuam om a,

I upna in kigal muh thei hi.

Ei’ aading tua gampha vangtung ah,

I Pa’n omna hong bawlkholh sak hi.


Chorus: Nung ciang in, a nopna

Tua gampha ah i kimu ding hi.

Nung ciang in, a nopna

Tua gampha ah i kimu ding hi.


Eite in tua gungal gampha ah,

Thupha-ngah mite langaih sa in,

Dah ngei nawn lo ding, i lung sung ah,

Khuisa ngei nawn lo ding, tawldam khin.


Hong piaksa vanglian hong itna-pi,

Hong siangsak thupha pahtawina la,

Tawlnga lo, phatna i sa ding hi.

Hong it vantung Pa Pasian mai ah.


Thuhilhsia 9:12

Mihing in a ma hun ding thei ngei lo hi. Thaang ah a awk vasate, ngeen ah a awk ngasate tawh i kibang hi. Lamet loh hun laitak keek in, hun sia sungah mihingte i tung hi.


John 11:25

Keimah in thohkikna leh nuntakna ka hi hi. Kei hong umte in a sih hangin a tho kik ding hi.

Ecclesiastes 9:12

For man also knoweth not his time: as the fishes that are taken in an evil net, and as the birds that are caught in the snare; so [are] the sons of men snared in an evil time, when it falleth suddenly upon them.

John 11:25

Jesus said unto her, I am the resurrection, and the life: he that believeth in me, though he were dead, yet shall he live:
Src: Tg Pau Lian Nun(Tonzang groupmail)