SIHNA A MONG ( Moment of Death )

Tonzang leh Tedim kikal ah tuahsiahna a thuakte phawkna in hih thului(article) kong hawm sawn hi.
Neng Pau, Miami
---------------------------------------------------------
SIHNA A MONG ( Moment of Death )
Mihingte bang hun lian in a nuntaakna uh bei a, tua khit ciang bang piang hiam cih pen Lai Siangtho tung tawn in ol no tak tawh kigen thei hi mah ta se leh, leitung pilna tawh kua mah in gen thei nai lo hi. National Geographic pan 2008 kum in a kibawl "Moment of Death"( documentary movie, Director Mark Mannucci) sung pan tom laak in a nuai ah kong gelh kik hi.

Lungtang ki-at ta ding George Justice kiang ah ," nuntaakna pen bang hi a, sihna pen bang hiam?" cih a kidot ciang in, " Thei ke'ng," ci kik hi. A nu' gil sung ah a om a kipan a lungtang kisai den pen siavuante in zatui sun in tawlkhat khawl sak ta hi. A beisa hun in, lungtang khawl sak, cih pen mi that cihna ahi hi. Nai nih bang a sawt khit ciang in, a ki-atna man ta a, a lungtang kisai sak kik uh a, nuntaakna kipan kik hi.
Khatvei, lampi gei khat ah Bill kici papi khat tuuk in khua phawk lo in om a, huih zong diik nawn lo, a lungtang kisai nawn lo hi. A khuak sung ah a kisam huih(oxygen) hun tomno khat sung in a lut kei leh, amah sisuak ding hi ta hi. Hi bang dan, khuak natna tawh U.S ah kum sim in mi 2015 bang si a, natna a thuak mi 100 lak ah 5 bek dam kik uh hi. Siavuante in Bill' pumpi tui vot ip tawh tuam cip in, a lum pia kik uh a, cidam sak kik thei uh hi. Sihna pen tawm bang kikhin thei ding cih um uh hi.

Mi hingte sih theihna nam (5) te:-
(1) Huih diik theih lohna ( tui kiate in a tuap sung ah tui tawh kidim in huih diik thei lo)
(2) Sisan tam luan na ( pumpi sung-a organ-te ah sisan puak lo, theep ta)
(3) Mei kang ( mei lian sang, meikhu in that masa zaw)
(4)Khua phelep tha(electric) in khuak sung tawn in khuak kisia sak)
(5) Gawl tan'na ( khuak leh pumpi kikhen)

1907 kum in Dr. Macdougall in mihingte a sih ciang, a kha pai khia ahih man in, a gikna a kiam hiam ci in experiment na bawl hi. Mi a si kuan khat pen pong kitehna dan khat tawh khai in, a lawm pa khat in tua mi si dek pa en gige a, a lawm dang khat in tua pong(pound) tehna khut(needle) en gige hi. Tua mi pa a sih phet in, pong tehna khut in Ounce seh 4 suah seh 1 kiam vat hi, ci hi.

18 century lai in French siavuante in mi pen si hi akicih zawh nai tampi sung si takpi nai lo hi, cih um uh hi. 1892 kum in Munich khuapi ah mi site inn golpi sung ah kikoih in, a khutme uh leh khau tawh zom in tua khau pen zan giak pa' tutna gei a, siik-long (bell) tawh kizom sak hi. Tua long ong gin leh a nungta kik om ei, ci in va en hi. Khut a muat man khawng tawh kia suk in khutme tawh akizom khauzang tung tawn in long a gin hun khawng tam zawk tuak hi. A si taktak uh hiam cih a theih nop uh ciang un, a bil sung, a naak sung, a kam sung ciang tawh hawlh zel uh hi. Dr. Lance Becker (University of Pennsylvania, Emergency Medicine) in cina gimte a kipuakna zato ah naseem a, nisim in mi si leh si lo cih pen a khensat pahpah pa ahi hi. Tua pa in, " Cina khat si ta ei, ka cih sim in ka lungsim ah a si takpi tam cih khat om kiaukuau den!" ci hi.
Mr. Hanandas kici papi khua phawk nawn lo khat a naak hawlh, a mit en, a bil hawlh, cih dan tuamtuam leh tu hun vanzat teng tawh a ki-et ciang in mi si khat mah ahi hi. Ahi zong in, ni (8) khit teh, tho kik in cidam mawk hi. Khuak-site a lungtang un naseem lai napi, bangmah phawk nawn lo hi. Mi gi lo khat thau tawh a kikapna pan a khuak si ta a, a lungtang kisai lai in, a sawt lo in a lungtang zong khawl hi. Khuak a sih leh, a dangte zong si ding cih dan ahi hi. Tua ahih manin, mi khat a khuak a sih leh a si akici thei takpi diam, cih zong a buai huai pi khat hi. Tua bang hun lian in bang piang hiam, cih zong thu thuuk pi hi.

Mawtaw tuahsiahna pan tawlkhat sung a si, Michaela Roser in a sih sung in mi khat in pom, a muh khempeuh khuavaak a kaang mu, a beisa hun khempeuh mu kik, a tu-te tawh kimawl(tua lai tak ta zong nei nai lo), tua khuavaak lam ah zuan nuam, nungta kik nuam, cih bang in hun tomno khat sung tampi khat mu kha hi. Tua pen leitung pilna a nei UCLA Brain Injury Research Center pan Dr. David Hovda in um thei lo hi. A ma'n hoih tak in nial kik hi-- US Air force in gal vanleeng F-15, F-16 cih bang ong bawl khiat uh teh, vanleeng hawl dingte in lung ap gawpna a thuak zawhna ding un manlang tak a kiveina (centrifugal) ah nakpi vei uh hi. Tua kiveina tha in a pua lam ah kaih khiatna tha nakpi piang sak a, 200 lb kiim a gik mi khat in 1800 lb bang a gik tawh kibang in thuak kha uh hi. A ci leh sa sung naakpi kigaak sak a, a khuak sung uh zong tua kigaakna tha tung hi. Khuak sung a, khua muhsakna munte naak pi kigaak gawp ahih man in, khua vaak peuh a mu, a beisa hun tuamtuam a mu kik tawh, themkhat sung si pak uh hi. Dr. David in tua thupiang tawh nial kik hi.

Khatvei leuleu, lungtang ki-at ding Al Sulivan pen a ki-at ma in siavuanpi pa Dr. Takata(Japanese) in a bawl ding teng Al tung ah a gen khit ciang a mit tuam sak in, puan tawh a mai dal a, ki-at kipan hi. Al in, Takata thugen a ngaih kawm, a thugen aman ma in, a kha pai khia a, a tung pan a sep a bawl khempeuh en suk hithiat hi. Takata in, a khut tung a nin a ban' ding ut lo ahih manin, a kiu tawh kawk koikoi in a sep pih siavuante a sawlsawlna, a gamtatna khempeuh Al in gen kik thei hi. Takata in bang khedap bulh hiam cih na ngawn hoihtak mu kha hi. Tua thu pen, leitung pilna tawh bang ci nial ding na hiam, cih Doctor David Hovda tung ah a kidot leuleu ciang in, " Leitung pilna lam tawh ka gen dan ding thei ke'ng, mipil khat ka hihna tawh thei lo cih ka pulaak ding zum tuan ke'ng. Ahi zong, tu zawh kum 20 bang ciang, a nial thei mipil ong om thei kha ding hi" ci hi. A lamdang kha khat pumpi sung pan pai khia hi cih pen a up loh hang, nial thei lo hi.

[USA Thupuak Vol .3 Issue 5 ah zong a sawt lo in ong suak ding hi.]
Src:Zonet