BAD NEWS

Tahan ah teng hong nusia khin Pu Lian Pum te motor Tedim- Kawlpi kikal ah 1985 kum kim pawl in atuahsiat lai un mi 14 si hi. Tua zawh tutung asi, amang atam pen hi'n Zogam tangthu ah zong asi atam pen ding in ki um mawh hi.
Tualzang khuataw ah tuahsia in a it mahmah uh sanggam u le nau nu le pa lawm le gualte, tu le tate hong nusia i sanggam 16 te luang hawm Dyna mawtaw khat tawh atenna khuatek uh ah tuni tak nai 5:30 kimpawl in kipuak khin ta cih thu kiza hi. Mipi tampi le Pasian nasem ei makaite zong aom thei zahzah in thungetna tawh innlam ah aciah ding hong nusia khin 16te mawtaw tung ah guangin thungetna tawh vai na kha khin uhi.
Akhuate uh pen Tonzang, Tuitum, Tungtuang, Anlang, Phaitu,Phuntong, Lomzang, Gam Ngai cih dan Tonzang gamsung khua kim phial ding hi.
Zato ah aliam 15 bang om lai le mi 3 gim mahmah in, tudong khuaphawk nai lo uh ci hi.
Tuitumte pasalno khat bang khuaphawk nailo in, apianna anu in mawtaw tuahsiatna ah hong nusia khin ci uhi. Tungtuangte Nu Nia Niang, Tedim ah pasalnei (Siangsawn Pawlpi)zong khua phawk nai lo ci uhi.
Asi amang phazah kigenthei nai lo le akikan zo nai lo ci uhi. Inn ah omlo le pawi sung ah mi tam luat tawh kuateng mang le aluang hawm kimu nailo cih kigen thei nai lo hi. Ki zong lai ding hi.
A motor bel kimu khin in, aki tawm zo pah nailo ci uhi.
Palik, galkap, thunei lamte le mipi khut kilen in huhna pia in adiang khawm uh cih zong kiza hi. Tedim khuazang ah om thei teng kiling lawng in, lainatpihna lianpi tawh khitui luang keuhkeuh in kikapkap ci uhi. Biakna makai tampi tak kim ahimani siluang teng akhak khit uh ciang zato ah om teng kiang nakpi tak in thunget sakna nei uhi.
Ei zong ei omna tek pan Thungetna ah phawkpih tek ni.